هاي، أنا مارينا وعايزة اشاركك إزاي اتعاملنا مع خلوة الروح القدس في برنامج ألفا خلال فترة الكورونا والحجر، وقتها فكرنا إزاي ممكن نعمل الخلوة أونلاين.
قررنا نجرب ونحاول نعملها لأن من خبراتنا في برنامج ألفا أدركنا أهمية وقت خلوة الروح القدس وتأثيرها في الأشخاص لان من خلالها بيتقابلوا مع المسيح وبيمتلئوا بالروح القدس.
في البداية مكوناش عارفين ممكن نعملها إزاي لان صعب نقضي اجازة نهاية الاسبوع على الانترنت والناس في بيوتها كمان صعب نقضي يوم كامل على الانترنت
علشان كده قررنا نعمل الخلوة لمدة ساعتين ونص على برنامج زووم واختارنا اليوم وحددنا الساعة وبدأنا بعدها نفكر في برنامج للوقت ولقينا إن انسب حاجة نعرض فيديوهين ويكون فيه وقتين للمناقشة في مجموعات صغيرة .
أول فيديو عرضناه كان، من هو الروح القدس؟ وبعد الفيديو اتقسمنا لمجموعات صغيرة نتناقش فيها وده بتقدر تعمله في برنامج زووم ، وبنقسم الناس على غرف دردشة.
وفي المجموعة بنغطي محتوى درس ما يفعله الروح القدس؟ وبنتأمل في ثمر الروح وازاي الروح القدس بينمي شخصية المسيح فينا .
وفتحنا مقطع كتابي مع الضيوف ، كورنثوس الأولى 12: 7-11. وبعدها عرضنا الفيديو التاني من سلسلة الأفلام عن الروح القدس ، وازاي امتلئ بالروح القدس ؟ لان ده من أهم المواضيع في الخلوة. بعد كده عملنا وقت مناقشة تاني في مجموعات صغيرة وبعد وقت المناقشة بناخد وقت نصلي مع بعض .
