من أفضل المرات اللي انعملت فيها ألفا، كانوا بيشتغلوا مع بعض كفريق، ونفس الشي بيصير لما منعمل ألفا أونلاين. بهالفيديو رح حاول وضحلك الأدوار الرئيسية اللي رح تحتاجها لتعمل ألفا بشكل ناجح عالانترنت.
في شوية أدوار رئيسية لازم تفكّر فيها لما تبدأ.
رح تحتاج
حدا يساعدك باستضافة الناس والترحيب فيهن،
ومساعدين للمجموعات الصغيرة،
وحدا يكون عارف وفاهم بأمور النت والتكنولوجيا،
وراح تحتاج فريق للصلاة.
ممكن تحتاج لشخص يكون بيدير اللقاء، بحيث يرحب بالناس لما بيدخلوا وبيتفاعل معاهن لبين ما يدخلوا الباقي، ف رح تحتاج حدا حماسي ومليان طاقة لهالمهمة.
وبيقدر يساعدك كمان انو يدخّل الناس لمجموعات المناقشة اللي هيي (الرومز) . لازم تكون جاهز بأسئلة المناقشة وألعاب كسر الجليد لتخلي الكل يشارك.
ممكن تحتاج كمان لأشخاص يكونوا كمضيفين ومساعدين معك.
لو انت عملت تدريب ألفا من قبل، ف ادعي الأشخاص اللي حضروا آخر مرة ليساعدوك بهالشي.
غالباً هي الناس بتعمل شغل كتير حلو لانهن فاهمين الموضوع وعارفين شو بيكون حاسس الضيف بوقتها.
ما بيختلف دور قائد المجموعة عالواقع عن دورو اونلاين، بس يمكن محتاج يكون أكتر حيوية ليعطي طاقة ويخلي الناس تتفاعل داخل المجموعة الصغيرة.
ممكن تطلب من الناس اللي بتساعدك انهن يعرضوا الشات اللي الناس بتفوت وبتكتب تعليقاتا فيها، وهيك منعطي فرصة حتى للأشخاص الهاديين او اللي مابيحبوا يشاركوا انهن يكتبوا تعليقاتن.
ممكن الناس بالمجموعات تشارك تتعمّق بالكلام أكتر فخلي فريقك حاضر وجاهز لهالشي.
بعد هيك..اتأكد من انو معك حدا شاطر تقنياً، ويعرف يتعامل لو صارت أي مشكلة وقت الفيديو أو المناقشات، ولازم يكون عارف انت اي برنامج رح تستخدم(سواء زووم او ماسنجر..أو اي تطبيق تاني) ويكون عارف وفاهم فيه.
انك تبني فريق صلاة يصلّي مشان ألفا أونلاين ما بيقل أهمية عن فريق الصلاة اللي بيصلّي لألفا اللي بتصير عالواقع. رح تحتاج لأشخاص يدعموك أنت وفريقك من ورا الكواليس ويصلولكن حتى الله يتقابل مع ضيوفكن. ممكن فريق الصلاة يكون عم يصلي بنفس الوقت اللي فيه الجلسة شغالة.
أول ما يبدأ برنامج ألفا تبعك، اتواصل مع فريقك كل اسبوع .
أغلب الفرق بتجتمع قبل الجلسة بنص ساعة للصلاة وتشجيع بعض باللي بيعملو الله بوسطهن.
بالعادة القائد بيعطي فكرة عن اللي متوقعو من الجلسة. اتواصل مع فريقك على مدار الأسبوع ممكن بمسج عالواتساب حتى تذكرهن بالصلاة من أجل الضيوف وتخبرهن بالتفاصيل المهمة للجلسة اللي بعدها.
آخر شي جيب كل أعضاء فريقك واعملوا تدريب لفريق ألفا، حتى لو كان البعض منن عمل التدريب من قبل . منقترح عليك أنو الكل يحضر. هالشي بيراجعلن كل معلوماتن وبيحسسهن انهن فعلاً فريق.
نحنا منشجعك أنك تعمل التدريب بكل مرة بتعمل فيها ألفا ونفس الشي بيكون أونلاين.
ف بيجتمع فريقك أونلاين وبتحكوا مع بعض وبتتناقشوا وبهيك بيكونوا أخدوا فكرة عن الجلسة الأولى واللي رح يصير فيها.
كل هالشي هوي مشان تخلي الناس العاديين يكونوا جزء من العمل اللي مش العادي.
لهيك، خود شوية وقت وفكّر بالأشخاص اللي رح يكونوا مناسبين لفريقك واكتوب اسماءهن
