الضيافة هدفها الأساسي إن الناس يشعروا أنهم معروفين ومحبوبين.
ومفتاح الضيافة في ألفا أونلاين هو خلق جو مريح للضيوف.
عادةً في مجموعات ألفا بنقدم وجبات خفيفة والضيوف بياكلوا مع بعض، لكن الموضوع مختلف شوية في مجموعات ألفا أونلاين. خليني أساعدك بشوية نصايح إزاي تعمل جو من الضيافة أونلاين .
أول حاجه : اتواصل من بدري مع الأشخاص اللي سجلوا في برنامج ألفا أونلاين، وابعتلهم مسج على الواتساب مثلا وفكرهم بالميعاد وعرفهم بأي وسيله هتتواصلوا مع بعض (زووم ، ماسنجر أو أي برنامج تاني ) كمان محتاج تقولهم على الخطوات اللي يعملوها علشان يبدأوا المكالمة .
تاني حاجه : بمجرد ما تبدأ المكالمة ويدخل الأشخاص، عرفّهم أكتر على البرنامج اللي بتتواصلوا عليه، زي منين يكتم أو يشغيل الصوت ، ازاي يوقف الفيديو ، إزاي يغيروا اسمهم .محتاج كمان تعرفّهم يعملوا ايه لو الاتصال وقف أو الانترنت حصل فيه مشكلة إزاي يسجلوا ويدخلوا مره تاني في المكالمة ؟ أو لو عندهم مشكلة فنية يتواصلوا مع مين ؟
تالت حاجة : مهم ماتسيبش وقت الناس فيه ساكتة.
من اكتر الحاجات المشجعة في ألفا انها بتدي فرصة للناس انها تتعرف على بعض اكتر ويقولوا رأيهم بأريحية.. عشان كده لما بتدخل ناس جديدة عالمكالمة، انقلهم للمجموعة الصغيرة من بدري (اللي هي غرف الدردشة فزووم) عشان يعرفوا مين معاهم في المجموعة.
لو كان فيه أشخاص في المكالمة ساكتين ومش بيتكلموا لمدة نص ساعة مثلاً، فممكن انهم يتوهوا منك.
عشان كده بننصحك انك تكسر الجليد من خلال لعبة سريعة او تقولهم نكتة عشان تجذب انتباه الكل.
رابع حاجه : شجع المساعدين اللي معاك يبعتوا من وقت للتاني رسايل صغيرة في الشات عشان يكسروا الملل والحواجز بين الضيوف فمثلا لو حد من الضيوف قال حاجة مفيدة في المجموعة ابعتله مسج في الشات ورحب بيه وقوله عجبني مشاركتك وشجعه . المهم انك تستفيد وتستخدم خاصية الشات أو الدردشة اللي بتكون موجودة في أي برنامج مكالمات بتستخدمه، كمان ده بساعد الناس الأنطوائية وبيحسسهم انهم مهمين ومتشافين وبيشجعهم كمان يتكلموا أكتر .
خامس حاجه : لغة الجسد من الحاجات المهمة جداً، عشان كده مهم تشجع الضيوف والمساعدين يقعدوا في مكان الإضاءة فيه كويسة ويقربوا من الكاميرا علشان يشوفوه بعض كويس ، فلو الناس قعده بعيد عن الكاميرا أو في إضاءة ضعيفة هيكون صعب الناس تشوف أو تسمع بعض. وافتكر إن تعبيراتك ولغة جسدك هتفرق في الترحيب بالناس وهتساعدهم يرتاحوا أكتر باقي وقت المجموعة.
افتكر ان كرم الضيافة هدفه ان الناس تحس بالانتماء، بغض النظر هما بيؤمنوا بايه . الكنايس لما بتعمل مجموعات ألفا بتبدع جداً في وقت الضيافة لكن في مجموعات ألفا أونلاين ممكن بأفكار بسيطة تخلق جو من الضيافة زي انك ممكن تبعتلهم دليفيري علي مكانهم أو ياخدوا كروت خصم ويطلبوا من أي مكان الوجبه اللي يحبوها .
كل ما عرفت توصل لضيوفك اد ايه هما متقدرين ومحبوبين ومرحب بيهم كل ما قطعت شوط كبير في كسر الحواجز وخلق جو مريح للضيوف.
